Draumurinn úti - Júlli var borinn út í dag

„Þeir eru að bera mig út úr mínu eigin húsnæði, ég á þetta skuldlaust," sagði Júlíus Þorbergsson, kenndur við búð sína, Drauminn, en Júlli var borinn út úr draumnum síðdegis í dag. Lögreglan þurfti meðal annars að brjóta sér leið í gegnum aðalhurðina á meðan Júlíus fylgdist með.

Héraðsdómur Reykjavíkur úrskurðaði um það fyrir skömmu að bera skyldi Júlíus út úr verslunarhúsnæði Draumsins við Rauðarárstíg og íbúð í sama húsi eins og Fréttablaðið greindi frá fyrir um tveimur vikum síðan. Saga Draumsins er því á enda, að minnsta kosti á þessum stað þar sem verslunin hefur verið rekin í nærri aldarfjórðung við mismikinn fögnuð íbúa í nágrenninu.

Eignirnar tvær, sem skráðar eru á Draum ehf., voru settar að veði fyrir láni sem sonur Júlíusar tók. Lánið fór í vanskil og í hönd fór langt og strangt innheimtuferli sem reyndist árangurslaust. Í október síðastliðnum voru eignirnar því að lokum seldar á nauðungaruppboði. Júlíus hefur hins vegar harðneitað að fara. Og í samtali við Vísi heldur hann því enn fram að hann hafi verið borinn út með ólöglegum hætti.

„Þetta er bara þjófnaður. Það var vitlaust málsnúmer á skjalinu," sagði Júlíus. „Það er verið að bera mig út ólöglega," bætti hann svo við.

Hæstiréttur staðfesti í lok september eins árs fangelsisdóm yfir Júlíusi fyrir að selja lyfseðilsskyld lyf út úr Draumnum. Í viðtali við Fréttablaðið sagðist Júlíus ekki vera búinn að sitja af sér neinn hluta dómsins. „Ég veit ekki alveg hvernig þetta verður," sagði hann.

Þegar lögregla gerði húsleit vegna þess máls í júní 2010 var Draumurinn innsiglaður. Lögregla taldi sig ekki geta haldið versluninni lokaðri eftir útgáfu ákæru og um áramótin 2011 og 2012 opnaði Júlíus hana á nýjan leik, einungis um mánuði áður en hann hlaut dóminn. Núna, ári síðar, er ljóst að Draumurinn sé á enda.