Segir eðlilegt að íhuga vantraust

Sigurður Ingi Jóhannsson, þingmaður Framsóknarflokksins, segir að stjórnarandstaðan hljóti að íhuga vantrauststillögu á ríkisstjórnina við þær aðstæður sem nú eru uppi. Stjórnin hafi ekki lengur meirihluta á þingi og þá spili niðurstaða Icesave málsins inn í. Eins og Vísir greindi frá í dag íhuga sjálfstæðismenn og framsóknarmenn að leggja fram vantrauststillögu.

Sigurður Ingi segir, í samtali við Reykjavík síðdegis, að ríkisstjórnin hafi enn ekki beðist afsökunar á málflutningi sínum í Icesave-málinu „Og hafa satt best að segja forherst í því og látið þau orð falla að ef málið hefði farið öðruvísi þá hefði verið rétt að aðrir hefðu beðist afsökunar. Það er í því ljósi sem menn hljóta að velta fyrir sér að setja fram vantraust. En það er líka alveg ljóst að í okkar samanburðarlöndum, Norðurlöndunum til að mynda, að ríkisstjórn sem hefði tapað tveimur þjóðaratkvæðagreiðslum og endirinn orðið eins gleðilegur og hann var að þá hefði slík stjórn beðist lausnar," segir Sigurður Ingi. Hann bíði því eftir því að ríkisstjórnin biðjist afsökunar eða íhugi stöðu sína.

Síðast var það Bjarni Benediktsson, formaður Sjálfstæðisflokksins, sem lagði fram vantrauststillögu á ríkisstjórnina. Það var í apríl 2011, rétt eftir seinni þjóðaratkvæðagreiðsluna um Icesave. Tillagan var fellt með 33 atkvæðum gegn 30.