Innlent

Björt framtíð ekki útibú frá Samfylkingunni

Gunnar Reynir Valþórsson skrifar

Guðmundur Steingrímsson formaður Bjartrar framtíðar segir gott gengi í skoðannakönnununum áægjulegt en að flokkurinn stefni þó hærra. Hann segir alrangt að Björt framtíð sé einhverskonar útibú frá Samfylkingunni.

Samkvæmt nýjasta Þjóðarpúlsi Capacent mælist Björt framtíð með 12,3% fylgi og næði níu þingmönnum inn miðað við þá sem taka afstöðu. Sjálfstæðisflokkurinn er stærstur með ríflega 36% og Samfylkingin fengi rétt rúm 19%. Næst kemur Framsóknarflokkurinn með 13% og Vinstri grænir mælast með 9%. Aðrir flokkar sem lýst hafa yfir framboði, Dögun, Píratar, Hægri grænir og Samstaða ná ekki manni inn.

Fylgi Bjartrar framtíðar hefur verið vaxandi frá því flokkurinn var fyrst kynntur til sögunnar.

„Nú erum við að auka fylgið af því að við vorum að kynna efstu sætin á listum okkar og þau eru væntanlega að falla vel í kramið," segir Guðmundur Steingrímsson.

Guðmundur segir að Björt framtíð stefni áfram og upp, í síðustu sveitarstjórnarkosningum hafi verið eftirspurn eftir nýrri nálgun í pólitík.

„Besti flokkurinn er að gera mjög góða hluti í borginni og hversvegna skyldum við ekki gera svipað á landsvísu?" spyr hann.

Gagnrýnendur Bjartrar framtíðar hafa sumir kallað flokkinn útibú frá Samfylkingunni, hvað segir Guðmundur við því?

„Þetta er bara ekki rétt. Stefnumál skarast á margan hátt. Við deilum evrópumálum með Samfylkingunni. Umhverfismálunum deilum við að miklu leyti með Vinstri Grænum. Svo höfum við ríkan áhuga á opnu markaðshagkerfi, svigrúmi og frelsi einstaklinga til að láta gott af sér leiða í atvinnumálum. Við deilum því með Sjálfstæðisflokknum," segir hann.

Guðmundur segir að liðsmenn flokksins séu ekkert farnir að ræða mögulega samstarfsfélaga að loknum kosningum. Ef flokkurinn fer í ríkisstjórnarsamstarf þá verði það á málefnalegum grunni.

Ætlið þið að taka gamla tvistið og ganga óbundin til kosninga?

„Ég myndi aldrei orða það þannig. Við erum opin fyrir skynsamlegu stjórnarsamstarfi á grunni málefna að sjálfsögðu," segir Guðmundur.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.