Síminn hjá Stígamótum hefur verið rauðglóandi

Síminn hefur varla stoppað hjá Stígamótum í dag, í kjölfar umfjöllunar Kastljóss um barnaníðinginn Karl Vigni Þorsteinsson. Sóknarprestur Áskirkjuprestakalls segir að viðurkenning sem veitt var Karli Vigni hafi orkað tvímælis á sínum tíma.

Á upptökum úr falinni myndavél sem sýndar voru í Kastljósi í gær játaði Karl Vignir að hafa brotið kynferðislega gegn allt að fimmtíu börnum.

Lögreglan ræddi við Karl Vigni í dag og boðaði hann til yfirheyrslu. Við stígamót, í næsta húsi, hefur fjöldi manns haft samband í dag, og viljað segja sína sögu.

„Það gerðist sem gerist gjarnan við slíkar fjölmiðlauppákomur að síminn hefur verið logandi hér í dag," segir Guðrún Jónsdóttir, talskona Stígamóta. „Bæði hefur fólk hringt hingað vegna ofbeldis sem það segir þennan mann hafa beitt og spyr hvernig það getur leitað sér hjálpar. Svo er annað fólk sem hefur verið beitt ofbeldi af öðrum og fundist það ekki hafa fengið hljómgrunn þegar það reyndi að leita sér hjálpar vegna þeirra mála."

Hún segist ekki hafa heildaryfirsýn yfir hvort þarna sé um að ræða mál tengd Karli Vigni sem séu ekki fyrnd.

„Eitt þeirra er fyrnt, gróf nauðgun," segir Guðrún.

Í Kastljósi var einnig vakin athygli á viðurkenningu sem Áskirkja veitti Karli Vigni fyrir tveimur árum. Í yfirlýsingu sem forsvarsmenn Áskirkju sendu frá sér í dag kemur fram að Karl Vignir kom aldrei að starfað með börnum og unglingum í Áskirkju.

„Í kjölfar umfjöllunar í fjölmiðlum árið 2007 um Karl Vigni, var hann leystur frá störfum sem sjálfboðaliði," segir í yfirlýsingu frá Áskirkju. „Það var síðan árið 2011 sem hann fékk viðurkenningu frá kirkjunni fyrir vel unnin störf."

„Í ljósi þess sem fram hefur komið í umfjöllun Kastljóss nú, og Karl Vignir játaði þar á sig, er augljóst að sú ákvörðun var röng," segir ennfremur í yfirlýsingunni.

Það var í mars 2007 sem Karl Vignir játaði hjá lögreglu að hafa misnotað þrjá drengi. DV greindi frá þessu skömmu síðar. Fjöldi greina birtust um játningar Karls Vignis um kynferðisbrot gegn börnum, og ennfremur um að þau væri fyrnd.

Það lá því skýrt fyrir að þegar Áskirkja veitti honum viðurkenningu að hann hafði játað kynferðisbrot, enda hafði honum áður verið vikið frá störfum vegna þessa.

Sóknarprestur Ásprestakalls, séra Sigurður Jónsson, sem ber ábyrgð á viðurkenningunni, segir í samtali við fréttastofu að viðurkenningin hafi orkað tvímælis á sínum tíma. Hann hafi litið á hana sem kærleiksvott og viðleitni til að leggja brotinni manneskju lið á leið sinni til betri vegar.