Myndin mun ekki gera lítið úr WikiLeaks

„Ég hef reynt að gera mitt besta til þess að tryggja að þetta verði ekki and-WikiLeaks-mynd," segir Birgitta Jónsdóttir, þingmaður Hreyfingarinnar um fyrirhugaða kvikmynd um vefsíðuna WikiLeaks og forsvarsmann hennar, Julian Assange.

Birgitta segist hafa samþykkt að veita ráðgjöf við kvikmyndina til þess að eiga tækifæri á að koma skoðun sinni á framfæri og tryggja að staðreyndir málsins væru réttar.

„Mér þykir mjög vænt um það WikiLeaks sem ég var hluti af og þau verk sem áttu sér stað," segir Birgitta.

Kristni Hrafnssyni, talsmanni WikiLeaks, líst illa á fyrirhugaða kvikmynd líkt og fjallað var um á Vísi fyrr í dag. Birgitta segir Kristin þó líklega byggja skoðun sína á fyrsta uppkasti að myndinni. „The Man Who Sold The World" hafi til að mynda verið vinnuheiti myndarinnar á þeim tíma en sé það ekki lengur.

Birgitta segist aðallega hafa veitt ráðgjöf vegna birtingu myndbandsins „Collateral Murder" sem bandaríski hermaðurinn Bradley Manning kom í hendur WikiLeaks.

„Ég þurfti að miðla réttum upplýsingum um hvað átti sér stað þegar við vorum að undirbúa það (myndbandið). Ég hef eytt gríðarlega miklum tíma í að reyna að tryggja að hlutur Julians (Assange) sé ekki í ójafnvægi við hans verk," segir Birgitta. Hún segist hafa verið lengi á fótum við ráðgjöf á myndinni undanfarna daga vegna tímamismunarins á Íslandi og Bandaríkjunum.

Birgitta telur að Benedict Cumberbatch, sem mun leika Assange í myndinni, verði afar góður í hlutverki Assange.

„Ég hef lagt mikla vinnu í að hlutirnir séu, miðað við Hollywood, eins réttir og þeir geta verið. Ég veit að bæði handritshöfundurinn og leikstjórinn eru miklir aðdáendur WikiLeaks. Það kæmi mér ekki á óvart ef Benedikt Cumberbatch væri það líka," segir Birgitta sem hefur séð enska leikarann í BBC-þáttunum um Sherlock Holmes.