Kópavogsbær fær gæðavottun

Kópavogsbær hefur fyrst íslenskra sveitarfélaga hlotið alþjóðlega vottun (ISO 9001) fyrir gæðakerfi stjórnsýslusviðs. Unnið hefur verið að innleiðingu gæðakerfisins síðustu misseri. Markmiðið er að tryggja góða og skilvirka þjónustu, gagnsæja stjórnsýslu, aukið öryggi og bætt eftirlit með kostnaði.

Ármann Kr. Ólafsson bæjarstjóri mun taka formlega við vottuninni úr hendi Ara Arnaldssonar, fulltrúa Vottunar ehf., í dag.

Um þennan áfanga, og í ljósi þess að stjórnsýslan í Kópavogi hefur verið gagnrýnd nokkuð harkalega, segir Ármann ljóst að tilgangurinn með gæðakerfi sé einmitt að bæta stjórnsýsluna. „Þetta á að auðvelda okkur að rækja það hlutverk sem okkur er ætlað sem sveitarfélags. Það er í tísku að tala um gagnsæi og þetta kerfi á að verða til þess að það markmið náist og allir sitji við sama borð. Eins að halda öllum á tánum, ekki aðeins starfsmönnum heldur okkur stjórnmálamönnunum líka, við að skila af okkur vönduðu verki,“ segir Ármanna.

Upphafleg tillaga að gæðakerfi fyrir stjórnsýslu Kópavogsbæjar var samþykkt í bæjarráði í júlí 2008 og var gæðastefnan samþykkt í bæjarstjórn í mars 2010. Gæðahandbók var svo staðfest í febrúar 2011.

- shá