Stjórnsýslan verður gerð aðgengilegri

Stýrihópur um rafræna stjórnsýslu og rafrænt lýðræði kom til fyrsta fundar á mánudag en verkefni hópsins er að vinna úr tillögum nefndar um eflingu sveitarstjórnarstigsins varðandi rafræna stjórnsýslu og lýðræði. Hópnum er ætlað að skila áfangaskýrslu til innanríkisráðherra í október.

Helstu áherslurnar eru á nauðsyn þess að auðvelda almenningi notkun rafrænnar stjórnsýslu og að rekin verði ein þjónustugátt fyrir alla rafræna þjónustu hins opinbera.

Í skýrslu nefndar um eflingu sveitarstjórnarstigsins voru settar fram 24 tillögur um aðgerðir til að efla sveitarstjórnarstigið og tóku níu þeirra til atriða er varða rafræna stjórnsýslu. Nefndin lagði meðal annars til að innanríkisráðuneytið og Samband íslenskra sveitarfélaga hefðu um það forystu og að vefurinn Ísland.is hjá Þjóðskrá yrði nýttur sem vettvangur fyrir slíkar umbætur.

Eins lagði nefndin til að ráðuneytið hefði forgöngu um gerð einna laga um kosningar og að sett yrði regluverk um rafrænar kosningar og rafræna kjörskrá. Þá var undirstrikað mikilvægi þess að mótað yrði fyrirkomulag varðandi rafrænar undirskriftasafnanir, skoðanakannanir og íbúakosningar. - shá