Telur refinn valda rjúpnaleysinu

Það sést lítið af rjúpu þetta árið og formaður skotveiðifélags Íslands telur allt benda til þess að þessi skortur á rjúpu sé refnum að kenna. Hann tekur djúpt í árinni og segir gríðarlegt ábyrgðarleysi af hálfu stjórnvalda að leyfa refastofninum að stækka gegndarlaust.

Það sést sífellt minna af rjúpu með hverju ári. „Við vitum að þessi stofn þoldi gríðarlegar veiðar hér áður fyrr, svo við teljum að það séu ekki veiðarnar sem hafa þessi áhrif. Það sem við vitum er að ref hefur fjölgað gríðarlega, jafnvel tífalt eða tólffalt frá því 1980. Það hlýtur bara að hafa áhrif," segir Elvar Árni Lund formaður skotveiðifélags Íslands.

Hann bendir á að refurinn hafi lítið annað að éta inn til landsins en rjúpuna og því taki hann mikið af henni. Hann segir minkinn einnig taka sinn toll þó það sé ekki jafnmikið og refurinn.

Elvar telur stjórnvöld hafa stigið feilspor í þeirri stefnu sinni að vernda refastofninn sem hefur stækkað margfalt á síðustu misserum. Hann telur að stofninn muni bara stækka áfram sökum þess að stefnu skorti hjá stjórnvöldum í málinu.

Hann segir óvenjulítið af rjúpu í ár og sums staðar sé bara eins og sviðin jörð, einkum í grennd við refafriðlandið á Vestfjörðum. Síðasti sunnudagur gaf ekki nógu vel hjá rjúpnaskyttum þó aðstæður hefðu verið prýðilegar.

„Menn voru að ganga í mjög góðum aðstæðum á sunnudaginn. Sjálfur gekk ég þar í toppaðstæðum og sá ekkert nema refaspor," segir Elvar.

Elvar ræddi málin í útvarpsþættinum Reykjavík Síðdegis í dag, en umræðurnar má nálgast á hlekknum hér að ofan.