Í sjálfheldu á lélegum dekkjum

Björgunarsveitinni Lífsbjörg í Snæfellsbæ barst fyrr í dag aðstoðarbeiðni vegna ökumanna sem voru í sjálfheldu í bílum sínum vegna hálku. Um var að ræða tvo bíla, annar var við Arnarstapa en hinn við Hnausa á sunnanverðu Snæfellsnesi og voru erlendir ferðamenn í þeim báðum. Björgunarsveitin fór á staðinn og voru bílarnir staðsettir á um 4 km löngu hálkubelti sem náði frá Hnausum að Hellahrauni. Björgunarmenn óku bílunum af hálkubeltinu en þeir voru báðir á afar lélegum dekkjum.