Fékk SMS þar sem stóð að hún ætti að drepa sig

Tvær ungar konur hafa stigið fram og greint frá afleiðingum eineltis í grunnskóla. Önnur þeirra fékk sms-skilaboð um að hún ætti að drepa sig. Hin var útskúfuð úr vinahóp aðeins ellefu ára gömul.

Anna Karen birti sína reynslusögu á Facebook í gær og í dag fylgdi Ingibjörg Aðalheiður í kjölfarið.

„Ég var búin að taka eftir þessum sögum sem eru í gangi í dag frá stúlkum sem eru að upplifa einelti. Mér fannst þær svo rosalega miklar hetjur að koma fram á meðan eineltinu stóð, því ég hefði aldrei getað gert það sjálf á sínum tíma," segir Anna Karen Ellertsdóttir.

Anna var lögð í einelti þegar hún var í Foldaskóla og Ingibjörg þegar hún var í Hamraskóla. Hún var afar lítil og grönn, og var uppnefnd kjúklingabein og fiskibein. Hún gerði sér upp veikindi til að þurfa ekki að fara í skólann.

„Ég var ekki með bjartar hugsanir. Maður horfði á allt og athugaði hvort maður gæti skaðað sig einhvern veginn. Svo þegar maður var í skólanum var þetta sem verst, þá lokaði maður sig inni þannig að maður væri einn," segir Ingibjörg Aðalheiður Gestsdóttir.

Anna hélt að af því krakkarnir vildu ekki vera vinir hennar þá væri hún hvorki skemmtileg né fyndin, og alla tíð hefur hún efast um sjálfa sig.

„Maður var búinn að byggja upp einhverja svona brynju, og sýndi kannski engin viðbrögð í skólanum. En ég get lofað ykkur því að þegar ég kom heim þá var ég ekkert voðalega skemmtileg. Þá var maður kannski að leysa út alla sína reiði á fjölskyldumeðlimum," segir Anna.

Ingibjörg komst loks inn í vinahóp, en var hent út úr honum þegar ný stelpa bættist við.

„Sterkasta minningin var þegar ég fékk SMS þar sem stóð að ég ætti að drepa mig. Þetta átti að verða lögreglumál en ég sem barn vildi náttúrulega ekki hafa einhverjar stórar afleiðingar," Ingibjörg.

Þær Anna og Ingibjörg kynntust við nám félagsráðgjöf, sem þær eru báðar brátt að ljúka og hafa þar unnið með afleiðingar eineltis.

„Við viljum fá fleiri sem hafa upplifað einelti, til að koma með sína sögu, til að sýna hinum sem eru í sömu stöðu, bæði gerendum og þolendum, hvaða afleiðingar þetta hefur til margra ára í kjölfarið og hversu mannskemmandi þetta er á meðan þessu stendur," segir Anna.