Fréttaskýring: Guðbjartur og Árni Páll í formannsslag

Hver verður formaður Samfylkingarinnar?



Guðbjartur Hannesson velferðarráðherra beið ekki boðanna heldur tilkynnti um framboð sitt til formanns Samfylkingarinnar daginn eftir að hann hafði sigur í forvali flokksins í Norðvesturkjördæmi. Guðbjartur hlaut góða kosningu í fyrsta sætið, 76 prósent, en Ólína Þorvarðardóttir bauð sig fram í fyrsta til annað sæti.

Framboð Guðbjarts kemur ekki á óvart. Hann hefur lengi verið í spilunum sem einn af arftökum Jóhönnu, þó að þær raddir hafi lækkað um skeið eftir fíaskóið með launahækkun forstjóra Landspítalans. Ferill hans þykir hins vegar að mestu óflekkaður að öðru leyti.

Guðbjarts bíður að heyja snarpa kosningabaráttu gegn Árna Páli Árnasyni. Árni Páll nýtur þess að hafa verið í opinberri kosningabaráttu í á þriðja mánuð og í raun má segja að undirbúningur formannsframboðs hans hafi hafist í janúar, eftir brotthvarf hans úr ríkisstjórn.

Árni Páll hefur verið gríðarlega duglegur, skrifað greinar í blöð og sótt fundi víða um land. Hann hafði betur en Katrín Júlíusdóttir fjármálaráðherra í prófkjöri í Suðvesturkjördæmi og ljóst er að sigling er á Árna. Hann mun njóta þess að hafa byrjað sitt framboð mun fyrr en Guðbjartur.

Guðbjartur er hins vegar ráðherra og mun njóta ýmissa aðgerða ríkisstjórnarinnar; hækkunar barnabóta og lengingar fæðingarorlofs, svo eitthvað sé tínt til.

Árni Páll hefur yfir sér það yfirbragð að vera meira til hægri í flokknum. Á hverju það byggist er óskilgreint, báðir eiga frambjóðendur uppruna sinn í Alþýðubandalaginu. Áran yfir Árna er hins vegar meira til hægri og til vinstri hjá Guðbjarti.

Það gæti haft áhrif á hluta kjósenda; í hvaða átt þeir vilji að flokkurinn fari. Þegar tveir menn takast á um sama embættið skiptir hins vegar meira máli hvernig kjósendum líst á hvorn um sig sem formann.

Greinendum hættir til að ofmeta strategíska hugsun kjósenda. Í grunninn mun niðurstaðan velta á því hvort félagar í Samfylkingunni treysti Árna Páli eða Guðbjarti betur til að leiða flokkinn til sigurs í kosningum. Ekkert annað.