Kæra Landsnet fyrir lögbrot

Samál, Samtök álframleiðenda, hafa kært hækkun Landsnets á flutningstaxta til úrskurðarnefndar raforkumála. Orkustofnun hafði samþykkt breytingar á tekjumörkun fyrirtækisins og sú ákvörðun er kærð, en fyrirtækið segir að hún stangist á við raforkulög. Búist er við úrskurði nefndarinnar fyrir áramót.

Landsnet hefur lagt til að verð á flutningi á raforku til dreifiveitna, og þar með almennings, hækki um níu prósent og um tuttugu prósent til stórnotenda.

Þorsteinn Víglundsson, framkvæmdastjóri Samáls, segir að Landsnet hafi hækkað taxta sinn gríðarlega mikið frá því að fyrirtækið var stofnað.

„Frá því að Landsnet var stofnað árið 2005 hefur flutningstaxti á hverja megavattsstund gagnvart stórnotendum hækkað um nærri 160 prósent, sé miðað við íslensku krónuna. Á sama tíma hefur flutningskostnaður fyrirtækisins, það er að segja allt annað en fjármagnskostnaður, lækkað um tvö prósent í krónum. Gagnvart almennum notendum er hækkunin um 44 prósent.“

Flutningstaxtinn er í dollurum gagnvart stórnotendum. Þorsteinn segir það gefa svipaða mynd; hækkunin í dollurum sé um 30 prósent, en lækkunin á flutningskostnaði fyrir Landsnet í dollar sé á sama tíma 53 prósent.

Í raforkulögum er ákvæði um tekjumörk sem sett eru yfir ákveðið tímabil og gjaldskrá verður að miðast við. „Markmið með setningu tekjumarka er að hvetja til hagræðingar í rekstri flutningsfyrirtækisins og tryggja að tekjur þess séu í samræmi við kostnað við þá þjónustu sem því er falið að veita, að teknu tilliti til arðsemi.“

Þessa grein laganna telur Samál að Landsnet brjóti.

Ragnar Guðmundsson, forstjóri Norðuráls, segir að mikil hagræðing hafi náðst í flutningskerfinu með stórnotendum og nýjum virkjunum, svo sem Hellisheiðarvirkjunum og verulegri stækkun á Grundartanga. Því hafi mátt búast við lækkun gjaldskrár Landsnets, en ekki hækkun eins og raunin varð.

„Lög gera ráð fyrir að hagræðing í rekstri eigi að skila sér til neytenda, en það hefur ekki gerst. Þetta er milljarða skattlagning á notendur sem er ekki heimil samkvæmt lögum og er í engu samræmi við rekstrarkostnað Landsnets.“