Formaðurinn á nýjum slóðum

Ákvörðun Sigmundar Davíðs Gunnlaugssonar, formanns Framsóknarflokksins, um að sækjast eftir efsta sætinu í Norðausturkjördæmi kom á óvart. Þó er deilt um hve mikið þetta kom þingmanni flokksins í kjördæminu, Höskuldi Þórhallssyni, á óvart, en hann og Sigmundur Davíð eru ósammála um það hver vissi hvað í aðdraganda þeirrar ákvörðunar.

Formaðurinn sigurstranglegur

Það ætti að vera formsatriði fyrir formann stjórnmálaflokks að færa sig á milli kjördæma, það er ekki lenska að fella formann, hvorki í Framsókn né öðrum flokkum. Höskuldur hefur hins vegar bitið í skjaldarrendur og sækist eftir efsta sætinu.

Tekist var á um hvaða leið yrði farin við að velja á lista og þar má segja að Sigmundur hafi unnið fyrsta slaginn.

Stuðningsmenn Höskuldar vildu að það yrði gert í póstkosningu allra félaga í kjördæminu. Formannsfólkið vildi hins vegar að haldið yrði tvöfalt kjördæmisþing og sú varð raunin.

Heimildarmenn Fréttablaðsins ganga sumir svo langt að segja að með því hafi Sigmundur Davíð í raun tryggt sér fyrsta sætið og ljóst er að Höskuldur vildi síst af öllu þessa leið. Það er auðveldara að kjósa gegn formanni heima í eldhúsi en á fundi þar sem maður gengur á mann.

Norðrið og austrið

Kjördæmisþingið tvöfalda verður haldið á morgun í Reykjahlíð í Mývatnssveit. Alls eiga 460 fulltrúar úr 23 félögum atkvæðisrétt. Kosið verður fyrst um efsta sæti listans, þá annað og svo koll af kolli. Frambjóðendur sem ekki hljóta brautargengi í efri sætin geta því boðið sig fram í þau neðri.

Kjördæmið er víðfeðmt og Höskuldur sækir stuðning sinn fyrst og fremst á Eyjafjarðarsvæðið. Akureyrarfélagið er það stærsta, með 98 fulltrúa. Austfirðingar eru hins vegar mjög fjölmennir. Ekki er ólíklegt að þingið reyni að ná jafnvægi á milli búsetu og framboðslistans.

Engin Jónína Ben

Uppstillingarnefnd hefur skilað tillögum sínum um sjö efstu sætin í hvoru Reykjavíkurkjördæminu. Athygli vekur að Jónínu Benediktsdóttur, sem sóttist eftir leiðtogasæti, er hvergi að finna á þeim lista.

Sigurður Harðarson, formaður kjörstjórnar og jafnframt uppstillingarnefndar, vill lítið tjá sig um tillöguna, en niðurstaðan hafi verið samhljóða. „Þetta er niðurstaða nefndarinnar og í sjálfu sér ekkert meira um það að segja.“

Til stóð að halda kjördæmisþingið í Reykjavík um síðustu helgi en því var frestað. Sigurður segir að uppstillingin hafi tekið lengri tíma en búist hafi verið við.