Kalla eftir fleiri umsögnum

Fastanefndir Alþingis hafa nú tvær vikur til að fjalla um og veita umsögn um valda hluta stjórnskipunarlaganna, sem lögð voru fram á þingi í haust í kjölfar ráðgefandi þjóðaratkvæðagreiðslu um drög að nýrri stjórnarskrá. Stjórnskipunar- og eftirlitsnefnd deildi fyrir helgi tilteknum köflum niður á þingnefndir, en þeim er ætlað að skila af sér fyrir 10. desember.

Valgerður Bjarnadóttir, formaður stjórnskipunar- og eftirlitsnefndar Alþingis, segist meðvituð um að nefndunum sé gefinn knappur tími en látið verði reyna á hvort þetta hafist ekki á þessum tíma. Ef ekki, verði skoðað hvort skilafrestur verði framlengdur í einhverjum tilvikum.

Þá stendur til að kalla á næstu dögum eftir umsögnum og athugasemdum frá almenningi, fræðimönnum og félagasamtökum, en ekki hefur verið ákveðið hversu langur frestur verður gefinn til umsagna. „Við höfðum þennan hátt á í fyrra og fengum þá mikið inn af umsögnum,“ segir Valgerður, en tekin verður ákvörðun um fyrirkomulagið á fundi nefndarinnar í dag. „Ég geri hins vegar ráð fyrir að flestir sem að þessu koma séu sama fólk og kom að þessu í fyrra,“ segir hún. Vegna þessa geti athugasemdafresturinn verið knappari en ella.