Rýmum fækkað um helming

Dvalarrýmum fyrir aldraða hefur fækkað um helming á síðustu sex árum, eða um 402 rými frá 2006 til 2011.

Þetta kemur fram í nýrri skýrslu Ríkisendurskoðunar um rekstur og starfsemi dvalarheimila aldraðra á þessum árum.

Öldruðum hefur fjölgað um tíu prósent frá árinu 2006. Fækkun rýma á dvalarheimilum er í samræmi við markmið stjórnvalda um að aldraðir geti eins lengi og unnt er búið við eðlilegt heimilislíf. Lögð hefur verið áhersla á að fjölga hjúkrunarrýmum í staðinn.

Á árunum sem Ríkisendurskoðun skoðaði hefur eftirspurn eftir dvalarrýmum dregist saman, sem talið er benda til þess að stefna stjórnvalda hafi gengið eftir.

Þótt biðlistar eftir þessum rýmum hafi styst eru þeir þó enn fyrir hendi.

Ríkisendurskoðun vill af þessum sökum að velferðarráðuneytið móti skýra stefnu um framtíð dvalarheimila og hvort þeim verði fækkað enn meir.