Nýtt kerfi tryggir meira úrval í ÁTVR

StjórnsýslaNýtt vöruvalskerfi hjá Áfengis- og tóbaksverslun ríkisins (ÁTVR), á að tryggja fjölbreyttara vöruúrval í vínbúðum landsins. Með nýja kerfinu geta vínbúðir boðið upp á 20 sérstakar vörur til að mæta staðbundinni eftirspurn í nágrenni hverrar og einnar.

„Þetta gefur okkur tækifæri á meiri sveigjanleika. Skýrasta dæmið eru vörur sem verða skyndilega vinsælar eins og til dæmis nýir íslenskir bjórar. Við höfum ekki haft neitt kerfi til að mæta þeirri eftirspurn almennilega fyrr en nú,“ segir Sigrún Ósk Sigurðardóttir, aðstoðarforstjóri ÁTVR.

Samkvæmt reglugerð um vöruval í Vínbúðunum er þeim skipt í þrjá flokka: minni vínbúðir, svæðisbúðir og stærri vínbúðir. Vöruúrval ræðst svo af stærðarflokki vínbúðanna.

Í gegnum svokallaðan sérflokk vara hafa einstakar vínbúðir getað tekið inn óhefðbundnar vörur til tímabundinnar sölu. Þar til í sumar gátu einstakar vínbúðir sömuleiðis boðið upp á vörur sem framleiddar voru í nágrenni þeirra í gegnum reglu um svokölluð nærsvæði. Eftirlitsstofnun EFTA (ESA) gerði hins vegar nýverið athugasemd við nærsvæðiskerfið á þeim forsendum að í því væri fólgin mismunun og var það fellt úr reglugerð í kjölfarið.

„Nýja kerfið um staðbundna eftirspurn var sett á fót eftir að athugasemdin kom frá ESA en það var ekki hugsað sem einhver krókur á móti bragði. Í nýja kerfinu er hægt að velja allar vörur, innlendar sem erlendar, svo það er engin mismunun fólgin í því,“ segir Sigrún og bætir við að einstakar búðir þurfi að sækja um að fá vörur í gegnum nýja kerfið. Að tveimur mánuðum liðnum er skoðað hvort næg eftirspurn sé eftir henni, ef svo reynist ekki vera er hún tekin út.