Sorpa boðar dómsmál verði starfsleyfið á Álfsnesi stytt

Sorpa segist ekki sætta sig við boðaða ákvörðun Umhverfisstofnunar um að aðeins verði veitt nýtt starfsleyfi til næstu tveggja ára fyrir urðunarstöð fyrirtækisins á Álfsnesi. Sorpa vill að leyfið gildi í tólf ár.

Umhverfisstofnun segir urðunarstaðinn ekki í samræmi við skipulagsáætlanir á Álfsnesi. Áður en stofnunin tekur ákvörðun sína er Sorpu gefið ráðrúm til andmæla. Athugasemdir Sorpu eru í meginatriðum þríþættar:

„Í fyrsta lagi að Umhverfisstofnun hafi ekki heimild að lögum til að byggja íþyngjandi ákvörðun um verulega stuttan gildistíma starfsleyfis á skipulagslegum forsendum enda feli það í sér brot gegn lögmætis- og réttmætisreglu stjórnsýsluréttarins, í öðru lagi að ekki rúmist innan valdsviðs Umhverfisstofnunar að framfylgja skipulagslegum ákvörðunum og í þriðja lagi að stofnunin misskilji eðli og efni þeirra skipulagsáætlana sem í gildi eru fyrir urðunarstaðinn á Álfsnesi,“ segir Ingi B. Poulsen, lögmaður Sorpu, í svari til Umhverfisstofnunar.

Að sögn lögmannsins felur boðuð ákvörðun í sér brot á meginreglum stjórnsýsluréttar. Þótt stofnunin geti ákveðið lengd starfsleyfa hafi myndast stjórnsýsluvenja um að þau séu gefin út til tólf ára. Þá hafi Umhverfisstofnun fram til þessa veitt starfsleyfi á lóðum sem ekki hafa verið deiliskipulagðar og nefnir dæmi þar um.

„Það hefur því ekki truflað útgáfu starfsleyfa hingað til að meðferð skipulagsáætlana hafi ekki verið í samræmi við lög. Gefur því augaleið að ætli stofnunin nú að setja efnislegt inntak í skilyrði fyrir starfsleyfi þá brýtur hún gegn jafnræðisreglu,“ segir í andmælum Sorpu.

Þá segir lögmaðurinn að komi einhvern tíma til þess að landnotkun á Álfsnesi verði í andstöðu við deiliskipulag sé ljóst að réttbært stjórnvald til að takast á við þá stöðu sé skipulags- og byggingarnefnd Reykjavíkurborgar, og eftir atvikum Skipulagsstofnun, en ekki Umhverfisstofnun.

„Verði niðurstaða Umhverfisstofnunar sú að binda gildistíma starfsleyfis Sorpu fyrir urðunarstaðinn á Álfsnesi við tvö ár í samræmi við óljósar yfirlýsingar í skipulagsáætlununum mun Sorpa láta reyna á þá ákvörðun fyrir æðra stjórnsýslustigi og dómstólum ef þurfa þykir og mun eftir atvikum gera kröfu um skaðabætur vegna þess tjóns sem ákvörðunin fyrirsjáanlega hefur í för með sér.“ segir lögmaður Sorpu. gar@frettabladid.is