Velferðarráðherra vill nýta fasteignasjóð fyrir geðsjúka

Guðbjartur Hannesson velferðarráðherra segir að til greina komi að nýta fjármagn úr Fasteignasjóði Jöfnunarsjóðs til að bæta úrræði fyrir geðfatlaða innan sveitarfélaganna. Ekkert hafi þó enn verið ákveðið varðandi ráðstöfun fjármagnsins og engar formlegar viðræður hafi farið fram.

Fasteignamat eigna Fasteignasjóðsins um áramótin 2010 til 2011 var um 3,5 milljarðar króna. Ástand fasteignanna var með mjög misjöfnum hætti og í sumum tilfellum var veruleg þörf fyrir endurbætur.

Komið hefur fram í Fréttablaðinu undanfarið að vegna of fárra búsetuúrræða innan sveitarfélaganna eða langra biðlista séu um áttatíu prósent sjúklinga á einni endurhæfingardeild Klepps föst á spítalanum.

Kostnaður við hvern sjúkling er um 81 þúsund krónur á dag og hafa nokkrir verið fastir þar í meira en ár þrátt fyrir að hafa lokið endurhæfingu.

Guðbjartur segir vandamál vegna úrræðaleysis fyrir geðfatlaða ekki vera nýtt af nálinni. Í Straumhvarfaverkefninu svokallaða árið 2006 var um tveimur milljörðum króna varið til þess að tryggja um 160 geðfötluðum einstaklingum víðs vegar af landinu búsetuúrræði.

Við yfirfærslu á málefnum fatlaðra frá ríki til sveitarfélaga í byrjun síðasta árs var Framkvæmdasjóður fatlaðra lagður niður, en sjóðurinn var í umsjá velferðarráðuneytisins. Þá tók Fasteignasjóður Jöfnunarsjóðs sveitarfélaga við öllum réttindum og skyldum gamla sjóðsins, meðal annars umráðarétti fasteigna, sem eru tæplega 80 íbúða- og þjónustuhúsnæðis á landinu, samkvæmt upplýsingum frá innanríkisráðuneytinu. Samkvæmt upplýsingum frá stjórn sjóðsins er söluandvirði fasteignanna ráðstafað í framlög til sveitarfélaga vegna búsetuþjónustu við fatlað fólk. Í fyrra var þó ekki innheimt leiga fyrir afnot húsanna en sveitarfélögum hafa verið boðnar fasteignirnar til kaups.Mikill meirihluti húsanna hefur verið seldur sveitarfélögum eða þjónustusvæðum.

?Ríkið fær greitt fyrir þessar eignir á næstu árum og ég sé fyrir mér að nýta þá peninga til að hjálpa sveitarfélögunum til að leysa úr þessum vanda, hvort sem um geðfatlaða eða annað fatlað fólk er að ræða,? segir velferðarráðherra.- sv