Snýst um snerpu og þolinmæði

„Ég hef æft japanskar skylmingar í átján ár og keppti meðal annars í greininni á heimsmeistaramóti í Japan árið 1996,“ segir fjölmiðlamaðurinn Sölvi Tryggvason, sem er að fara af stað með námskeið í kendó, japönskum skylmingum.

Sölvi kynntist japanskri bardagalist í gegnum föður sinn, Tryggva Sigurðsson, þegar hann var lítill strákur. Sölvi segir japanskar skylmingar sérstaka grein sem byggi á ríkri hefð í Japan. „Þetta er bardagalist sem gerir meira út á snerpu og þolinmæði en líkamlegan styrk.

Í Japan er þetta ákveðinn lífsstíll sem menn aðhyllast og snýst um mikinn aga og einbeitni,“ segir Sölvi, en barist er með trésverðum og bambusspjótum. „Það er mesta furða hversu lítið er um meiðsl í þessu sporti. Maður fær í mesta lagi nokkra góða marbletti sem herða mann bara.“

Sölvi hefur ekki stundað íþróttina í fjögur ár og hlakkar því mikið til að klæðast búningnum á nýjan leik. Búningurinn samanstendur af eins konar brynju, buxnapilsi og hjálmi.

Sölvi hefur áður haldið námskeið í kendó og hvetur konur jafnt sem karla til að skrá sig.

Takmarkað pláss er í boði á námskeiðinu, sem haldið verður í Combat Gym. „Það eru allir velkomnir, en þeir sem eru að leita að slagsmálum munu sennilega ekki finna það sem þeir eru að leita að.“ Hægt er að skrá sig á solvi@skjarinn.is eða combat@combat.is.

- áp