Þóra notaði Facebook mest - Ólafur Ragnar svaraði sjaldnast

Þekkingarfyrirtækið Cloud Engineering hefur tekið saman virkni og notkun forsetaframbjóðanda á samskiptavefnum Facebook. Um er að ræða nokkuð óvísindalega könnun en engu að síður ágætis vísir að því hvernig frambjóðendur notuðu þennan nýja miðil sem aldrei hefur verið nýttur í forsetakosningum hér á landi.

Hvað Facebook varðar þá er ótvíræður sigurvegari forsetakosninganna Þóra Arnórsdóttir. Fylgjendur Þóru virðast vera mjög dyggir og hafa til að mynda deilt stöðuuppfærslum hennar 4434 sinnum eða að meðaltali 23.2 sinnum. Til samanburðar hafa fylgjendur Ólafs Ragnars Grímssonar aðeins deilt stöðuuppfærslum hans 419 sinnum eða að meðaltali 4.8 sinnum.

Sá frambjóðandi sem stóð sig langbest í að bregðast við innleggjum frá fylgjendum sínum er Ari Trausti sem brást á einn eða annan hátt við 83 af 86 innleggjum á síðuna sína. Á hinn bóginn virðist Ólafur Ragnar ekki hafa haft nægilega mikinn tíma til að sinna fylgjendum sínum á Facebook og svaraði þar einungis 7 af 76 innleggjum á síðuna sína.

Herdís Þorgeirsdóttur var hinsvegar duglegust við stöðuuppfærslur en á tímabilinu 1. til 30. júní þá var Herdís með 215 stöðuppfærslur á meðan Þóra var með 191 uppfærslu.

Allir frambjóðendur notuðu samskiptavefinn nokkuð mikið.

Hægt er að rýna í tölurnar hér.