Fleiri stelpur í hestaíþróttinni

Þátttaka stelpna í hestaíþróttum hefur farið vaxandi. Hér á landi hafa strákar verið duglegri við að stunda íþróttina þótt kynjahlutföll skráðra meðlima í hestamannafélögum á Íslandi séu nokkuð jöfn.

Haraldur Þórarinsson, formaður Landssambands hestamannafélaga, bendir á að erlendis taki konur meiri þátt en karlar, þar sem konur eru um 80 prósent hestamanna sem starfa í skipulögðum félögum.

Landsmót hestamanna fer nú fram í Víðidal í Reykjavík. Haraldur segir stelpur vera að sækja á. „Ef við horfum á yngri flokkana á landsmótinu þá sjáum við mikið fleiri stelpur skráðar til leiks.“ Skýringuna segir hann hugsanlega felast í því að strákar kjósi heldur meira kapp en stelpur og fái ekki nóg af því í hefðbundnum keppnisgreinum hestaíþrótta. Á mótinu í ár er þó í fyrsta sinn í nokkurn tíma keppt í stökki ásamt hefðbundnum greinum.

„Nú er þróunin að snúast við. Íslenskar stelpur eru að sækja á,“ segir Haraldur.

- bþh / sjá síðu 10