Gagga eftir hvolpafóðri um nætur

„Við ætlum að hafa þau hérna hjá okkur í sumar. Þau eru öll að braggast, borða vel og leika sér úti í grasinu, þó þau séu nú enn óttalega ósjálfbjarga,“ segir Andri Johnsen, annar skálavarðanna í Langadal.

Grenjaskytta fann tvo munaðarlausa yrðlinga í Rangárvallasýslu á dögunum og afhenti skálavörðunum í Langadal. Að sögn Andra er um að ræða tveggja vikna gamla yrðlinga, ref og tófu, sem hafa nú fengið nöfnin Fúsi og Matthildur.

„Þau eru dugleg að gagga á okkur á nóttunni og morgnana til að vekja okkur ef þau eru svöng,“ segir Andri. Fúsi og Matthildur borða Pedigree-hvolpafóður af bestu lyst, reyndar svo mikið að fósturforeldrar þeirra þurfa gjarnan að stoppa þau af.

„Svo vekja þau mikla lukku hjá ferðamönnunum,“ segir Andri. „En það ræðst svo með haustinu hvernig vetrinum verður háttað hjá þeim.“ - sv