Ákærðir fyrir fjárkúgun og nauðung

Ríkissaksóknari hefur ákært Elís Helga Ævarsson og Steindór Hrein Veigarsson fyrir að svipta tvo bræður frelsi sínu, kúga fé út úr öðrum þeirra og annan þeirra fyrir að reyna auk þess að ræna hann nokkrum mánuðum seinna.

Elís Helgi er ákærður fyrir að hafa farið heim til annars bróðurins í apríl í fyrra og hóta honum ofbeldi ef hann greiddi sér ekki fé. Daginn eftir fór bróðirinn og tók eina milljón króna út úr banka og afhenti Elís, sem fylgdi honum í bankann. Elís er svo ákærður ásamt Steindóri fyrir að fara á heimili bræðranna í september í fyrra, halda öðrum þeirra nauðugum á heimilinu á meðan farið var með hinn út í hraðbanka í því skyni að hafa af honum peninga. Þar tók lögreglan á móti þeim og mennirnir voru handteknir.

Þeir eru auk þess ákærðir fyrir fíkniefnalagabrot, gripdeild og líkamsárás. Elís Helgi var árið 2000 dæmdur í sextán ára fangelsi fyrir að myrða áttræða konu í Espigerði. Steindór var árið 2007 dæmdur í fjögurra ára fangelsi fyrir nokkrar hrottafengnar líkamsárásir á Akureyri. Hann klippti meðal annars fingur af manni.- sh