Vilja veðbanka á kappreiðarnar

„Við erum ekki alveg úrkula vonar um að leyfið fáist endurnýjað, svo menn geti starfrækt veðbanka á kappreiðunum. Það væri gaman ef menn mættu veðja aðeins á þann hest sem þeir telja líklegastan," segir Haraldur Þórarinsson, formaður Landssamtaka hestamannafélaga.

Þegar Haraldur hringdi í innanríkisráðuneytið í gær kom í ljós að leyfi Hestamannafélagsins Fáks var ekki í gildi, en Haraldur útilokar ekki að því verði kippt í liðinn.

Boðið var upp á veðbanka á Landsmótinu á Melgerðismelum árið 1998. Þá var Fákur fenginn til að flytja starfsfólk veðbanka og rásbása á svæðið við gríðargóðar undirtektir. Að því er næst verður komist hefur Fákur haft leyfi til þessarar starfsemi allt frá stofnun félagsins árið 1922.

Keppt verður í 300 metra stökki og fer keppnin fram á morgun klukkan 18.15 á stóra vellinum. Þrettán knapar hafa skráð sig til leiks.- shá