Söngkonur sækja í sixtís-kjólana

Fjöldi litskrúðugra kjóla er nú meðal þess sem hægt er að kaupa á nytjamarkaði Fjölskylduhjálpar Íslands, sem er opinn í höfuðstöðvum samtakanna í Eskihlíð alla virka daga frá tólf til hálffimm.

„Þetta eru mjög flottir kjólar frá sixtís-tímabilinu,“ segir Ásgerður Jóna Flosadóttir, forstöðukona Fjölskylduhjálparinnar. Kjólarnir eru gjöf frá versluninni Rokki og rósum og þótt Ásgerður hafi ekki tölu á því hversu marga hún hefur til sölu þá skýtur hún á að þeir séu varla færri en tvö hundruð.

Hún segir að kjólarnir hafi rokið út. „Dansarar og söngkonur sækjast mjög eftir þessu af því að þær þurfa að eiga svo marga og flotta kjóla.“ Klæðin eru seld á eitt til þrjú þúsund krónur og ágóðinn af þeim rennur í matarsjóð samtakanna.

Matargjöfum verður úthlutað hjá Fjölskylduhjálpinni í Eskihlíð í dag í síðasta sinn fyrir sumarfrí, og á fimmtudag í Reykjanesbæ. Nytjamarkaðurinn verður hins vegar opinn fram að mánaðamótum. - sh