Hafa vart undan að tína rusl í hrauninu

Árvakur lesandi sendi Fréttablaðinu ábendingu um mikið rusl við Krýsuvíkurveg í Hafnarfirði.

„Þetta eru hljóðkútar sem var stolið af geymslusvæðinu við álverið. Einhver verðmæti voru tekin úr kútunum og hratinu svo kastað þarna. En þetta var hreinsað í síðustu viku,“ segir Sigurður Páll Harðarson, sviðstjóri umhverfis- og framkvæmdasviðs Hafnarfjarðarbæjar.

Sigurður segir að þetta sé ekki í eina skiptið sem rusli sé hent í hraunið.

„Ég held að það sé lítill hluti fólks sem gerir þetta en það eru alltaf einhverjir sem láta freistast.“

Björn Hilmarsson, garðyrkjustjóri Hafnarfjarðar og yfirmaður þjónustumiðstöðvarinnar, segir rusl í hrauninu viðvarandi vandamál.

„Þetta er rosalega algengt og búið að standa lengi yfir. Við reynum að fara reglulega í upplandið og tína drasl en það er alveg ótrúlegt hverju er hent. Við reynum að fara allavega aðra hvora viku yfir sumartímann og kíkja á þetta.“

Björn segir að auðvelt ætti að vera fyrir fólk að koma ruslinu fyrir á öðrum og viðeigandi stöðum.

„Það er ótrúlegt hvað fólk virðist leggja á sig til að fara í skjóli myrkurs til þess að losa rusl í gjótur hingað og þangað. Oft og tíðum er hægt að losna við þetta dót frítt hjá Gámaþjónustunni eða Sorpu.“

Björn segir nær engin takmörk fyrir því sem fólk lætur frá sér í hraunið. „Við erum að hirða alls kyns dót, sófasett og fleira. Á sínum tíma voru þetta líka bílhræ og jafnvel rafgeymar. Stundum hefur líka verið kveikt í bílum þarna.“

Við slík tilfelli þarf að koma vinnuvélum á svæðið til að hreinsa ruslið upp. „Stundum þarf að fá kranabíl til að hirða upp draslið, þegar um stærra og þyngra dót er að ræða. Maður skilur ekki hvernig sumt draslið hefur komist á staðinn nema með öðrum vörubílum.“

Björn segist undrandi á því hvernig fólk virðist hugsa. „Ef þú ert laus við þitt drasl, þá ert þú bara stikkfrí sama þó því sé hent í fallega hraungjótu. Þetta er alveg ótrúlegt.“katrin@frettabladid.is