"Ómaklegar, órökstuddar og feiknalega ósanngjarnar"

Steingrímur J. Sigfússon segir ómaklegt og fáránlegt hjá þingmönnum Sjálfstæðisflokksins að kenna núverandi ríkisstjórn um óvænt útgjöld vegna yfirtökunnar á Sparisjóðnum í Keflavík. Ríkið hafi þar fengið vanda í fangið sem skapaðist vegna þess hvernig sparisjóðnum var stýrt.

Það var niðurstaða úrskurðarnefndar sem fjallaði um ágreining milli ríkisins og Landsbankans um verðmæti eigna SpKef að ríkið þyrfti að greiða Landsbankanum 19 milljarða króna með þeim innistæðum sem Landsbankinn tók yfir við sameininguna við sparisjóðinn. Þetta er 8 milljörðum króna hærri fjárhæð en lagt var upp með í fyrra þegar sameining SpKef og Landsbankans var kynnt.

Bjarni Benediktsson formaður Sjálfstæðisflokksins kallaði eftir því í kvöldfréttum okkar á föstudag að einhver þyrfti að axla ábyrgð á þessu „klúðri."

Þá vill Guðlaugur Þór Þórðarson rannsókn aðkomu fjármálaráðuneytisins að SpKef í tíð Steingríms J. Sigfússonar. Steingrímur segir þetta fráleitan málflutning.

„Ríkið kemur að málinu þegar allt er búið og gert og kemur að starfsemi sparisjóðsins og þegar engu verður um hið liðna breytt. Þess vegna er það feiknalega ósanngjarnt og ómaklegt að koma með ásakanir af því tagi sem í reynd láta að því liggja að ábyrgðin á þessum ósköpum sé hjá ríkinu, sem fær þetta í fangið, en ekki hjá þeim sem stýrðu sparisjóðnum. Áður en menn sýna fram á það með rökum og dæmum að forða hefði mátt einhverju tjóni með öðrum aðgerðum þá ættu menn nú að fara varlega í slíkar ásakanir. Þær eru ómaklegar, órökstuddar og feiknalega ósanngjarnar og mér finnst það koma úr hörðustu átt að þær komi frá forystumönnum Sjálfstæðisflokksins. En auðvitað eru þeir að reyna að draga upp þá mynd fyrir þjóðinni að hér hafi ekki í sjálfu sér orðið bankahrun. „Hið svokallaða bankahrun" segja þeir sumir hverjir og reyna að yfirfæra ábyrgðina á þessum hörmungum yfir á þau stjórnvöld sem fengu það hlutskipti að vinna úr þessu," segir Steingrímur J. Sigfússon.

Þingmenn Sjálfstæðisflokksins sem gagnrýnt hafa aðkomu fjármálaráðuneytisins að SpKef hafa ekki komið með nein dæmi um hvað stjórnvöld áttu að gera öðruvísi þegar SpKef var tekinn yfir og síðar sameinaður Landsbankanum. Í gildi er yfirlýsing um tryggingu ríkisins á öllum innistæðum í landinu og ef það átti að láta viðskiptavini fjármálafyrirtækja njóta jafnræðis var útilokað fyrir ríkið að gera eitthvað annað en að ábyrgjast skuldbindingar SpKef gagnvart sparifjáreigendum.

Í haust er væntanleg skýrsla rannsóknarnefndar sparisjóðanna þar sem meðal annars verður ítarlega fjallað um lánveitingar Sparisjóðsins í Keflavík. thorbjorn@stod2.is