Guðmundur: Það kemur smá kökkur í hálsinn

Töluvert er um meiðsli leikmanna í íslenska landsliðshópnum sem mætir Argentínumönnum í tveimur æfingaleikjum á laugardag og mánudag. Leikirnir eru þeir síðustu sem íslenska liðið leikur fyrir Ólympíuleikana í London þar sem fyrstu andstæðingarnir verða einmitt Argentínumenn.

„Það getur verið að Óli Stef hvíli eitthvað um helgina og Aron Pálmarsson einnig að öllum líkindum. Óli Bjarki missteig sig á æfingu þannig að það er óljóst hve mikið hann getur verið með um helgina," segir Guðmundur sem hefur áhyggjur af meiðslum Arons Pálmarssonar.

„Það er áhyggjuefni. Við áttum langt samtal við lækni liðsins sem telja að við getum komið honum í stand fyrir Ólympíuleikana. Auðvitað er það aldrei óskastaða þegar leikmaður getur sáralítið æft með liðinu," segir Guðmundur.

Leikirnir gegn Argentínu verða þeir síðustu sem íslenska liðið leikur undir stjórn Guðmundar hér á landi. Ólympíuleikarnir eru hans síðasta verkefni áður en hann snýr sér alfarið að þjálfun Rhein-Neckar Löwen í þýsku úrvalsdeildinni í handbolta.

„Ég hef svo lítið hugsað um það. Öll einbeitingin fer í að undirbúa liðið fyrir fyrsta leik á Ólympíuleikina. Að vissu leyti er söknuður í manni, smá kökkur í hálsinum," segir Guðmundur og hlær.

Í dag var dregið í riðla fyrir heimsmeistaramótið sem fram fer á Spáni í janúar. Guðmundur var beðinn um álit sitt á riðli Íslands sem Rússar, Danir, Makedóníumenn, Katarmenn og Chilemenn skipa.

„Þetta er mjög léttur riðill," segir Guðmundur og skellir upp úr.

„Þetta er spennandi og skemmtilegur riðill. Það er alltaf gaman að vera með Dönum í riðli og slæmt að verða af því. Það er hægt að vinna öll þessi lið en auðvitað ekki auðveldir leikir. Rússar eru að koma upp aftur finnst mér og auk þess eru Makedóníumenn mjög erfiðir. Við getum alltaf unnið Dani ef við spilum eins og menn. Eftir að hafa séð Chile ætti það að vera auðveldur leikur og sömuleiðis gegn Katar."