Ákærður fyrir að skera pilt með dúkahníf - tveir til viðbótar ákærðir

Þrír karlmenn eru ákærðir fyrir meiriháttar, og sérstaklega hættulega líkamsárás í Héraðsdómi Reykjavíkur. Tveir mannanna, sem eru átján og tuttugu ára gamlir, eru ákærðir fyrir að hafa gengið í skrokk á þeim þriðja, sem er einnig átján ára gamall, fyrir utan Kolaportið í mars síðastliðnum.

Piltarnir eiga að hafa slegið og sparkað í þann þriðja með þeim afleiðingu að hann hlaut bólgur og það blæddi inn á heilavef.

Sá þriðji, eða fórnarlambið úr fyrra málinu, er síðan ákærður fyrir að ráðast á jafnaldra sinn sem hefur verið ákærður fyrir að ganga í skrokk á honum sjálfum ásamt tvítugum félaga sínum, eins og fyrr greinir frá.

Sá á, sama kvöld, að hafa veist að jafnaldra sínum á sama stað með því að skalla hann í höfuð, slá hann ítrekað í líkama og höfuð og hafa með blaði úr dúkhníf veitt honum rúmlega 40 sentímetra skurðarsár á kvið sem náði frá vinstri rifjaboga lóðrétt niður að vinstri mjaðmarspaða og þaðan aftur á við.

Málin eru þingfest í dag en ekki er hægt að ráða af ákæruskjölum hvor árásin átti sér stað á undan eða hvernig málum var háttað þetta kvöld.