Kjörgögnum verði eytt

Eyða ber öllum kjörgögnum um leið og kosningum á lista lýkur, samkvæmt reglum Samfylkingarinnar. Formaður kjörstjórnar flokksins í Reykjavík, Stefán Benediktsson, hefur tilkynnt Jafnaðarmannafélaginu Rósinni að það fái ekki aðgang að kjörgögnum, eins og óskað hafði verið eftir, þar sem lög flokksins heimili það ekki.

Sigurður G. Guðjónsson, lögmaður Rósarinnar, fór fram á að fá öll gögn afhent sem tengjast þeirri ákvörðun að taka fjölda félaga í Rósinni af kjörskrá forvals á framboðslista um þarsíðustu helgi.

„Samkvæmt grein 6.11 í skuldbindandi reglum Samfylkingarinnar um aðferðir við val á framboðslista ber að eyða kjörgögnum þegar kærufrestur er liðinn, en hann rennur út við lok kosningarinnar,“ segir í svari formanns kjörstjórnar við þeirri beiðni.

Sigurður segir að óeðlilegt sé að eyða kjörgögnum um leið og kærufrestur sé úti. Alltaf geti komið til ágreinings og þá megi ekki vera búið að eyðileggja gögn. Sigurður kærði ákvörðun kjörstjórnar um að fella fólkið af kjörskrá, en úrskurðarnefnd staðfesti þá ákvörðun.

„Þar með er ekki sagt að ég geti ekki borið ágreininginn undir dómstóla. Ef ég ætlaði að gera það þyrfti ég auðvitað að hafa gögnin undir höndum sem deilan snýst um.“

Stefán Benediktsson segir að ekki sé búið að eyða gögnunum. „Okkur ber hins vegar skylda til þess samkvæmt reglunum. Kjörstjórn ætlar að reyna að halda fund í vikunni og fyrr en það hefur verið gert get ég ekkert sagt um málið.“

Sigurður bendir á að í lögum Samfylkingarinnar segi að fara beri eftir landslögum. Það liggi í hlutarins eðli að hægt sé að bera réttarágreining undir dómstóla og sé ágreiningur megi ekki eyða gögnum.