Fjölmörg slys vegna hálku á Suðurnesjum

Fjölmörg umferðaróhöpp hafa orðið á Suðurnesjum síðustu daga. Flest hafa orðið vegna hálku. Ökumaður missti stjórn á bifreið sinni á Grindavíkurvegi og hafnaði á skilti utan vegar.

Þá hafnaði önnur bifreið á kantsteini af sömu sökum og urður skemmdir á hjólabúnaði hennar. Á Reykjanesbraut missti ökumaður stjórn á bifreið sinni vegna hálku og hafnaði bifreiðin utanvegar eftir að hafa rekist utan í aðra bifreið. Fjórða bílnum var ekið á ljósastaur á Grænásvegi.

Auk þessa varð minniháttar árekstur í Njarðvík í gær. Þá barst lögreglu tilkynning um bifreið sem hafði orðið fyrir skemmdum eftir að ekið hafði verið utan í hana. Sá sem olli þeim lét sig hverfa af vettvangi.