Þórir og norsku stelpurnar unnu Ólympíugullið í kvöld - myndir

Þórir Hergeirsson gerði norska kvennalandsliðið í handbolta að Ólympíumeisturum í London í kvöld og íslenski þjálfarinn er því búinn að ná gullnu þrennunni þar sem liðið hans hefur unnið öll þrjú stórmótin, EM, HM og ÓL, á undanförnum þremur árum.

Norsku stelpurnar byrjuðu mótið ekki vel en eins og áður undir stjórn Þóris þá spiluðu þær betur og betur með hverjum leik. Norska liðið var með frumkvæðið allan úrslitaleikinn á móti Svartfjallalandi en þurfti að hafa fyrir sigrinum á móti væntanlegum mótherjum íslenska landsliðsins á EM í Serbíu í desember.

Norska kvennalandsliðið hefur unnið þrjú gull og eitt brons á þeim fjórum stórmótum sem liðið hefur tekið þátt í síðan að Þórir tók við liðinu árið 2009.

Við höfum tekið saman nokkra myndir frá AFP-myndabankanum af fögnuði Þóris og norsku stelpnanna í kvöld. Myndirnar má sjá í albúminu hér að neðan. Hægt er að sjá myndirnar stærri með því að smella á þær.