Íslensk kona lífshættulega slösuð í Kaupmannahöfn

Lögreglan í Kaupmannahöfn þurfti að kalla út björgunarþyrlu með tveimur köfurum um borð til að bjarga ölvuðu íslensku pari upp úr Peblinge vatninu sem liggur í miðju Nörrebro hverfinu. Konan liggur nú í öndunarvél á gjörgæsludeild og er talin í lífshættu.

Konan og maðurinn, sem bæði eru 27 ára gömul, féllu í vatnið af Dronning Louise brúnni á fimmta tímanum í nótt. Vitni að þeim atburði hringdu í neyðarlínuna.

Kafararnir í þyrlunni komu fljótt auga á manninn og var hann hífður á þurrt land með þyrlunni. Erfiðlega gekk að finna konuna þar sem hana hafði borið undir brúna en það tókst eftir rúmlega 25 mínútum og var hún einnig hífð á land. Konan var flutt á gjörgæsludeild og liggur þar í öndunarvél að sögn Politiken en ástand hennar er alvarlegt að sögn blaðsins.

Ekkert amar að manninum en hann var verulega ölvaður eins og einn af varðstjórum lögreglunnar orðar það.