Flugbjörgunarsveitin vekur athygli í Bandaríkjunum

Bandaríski fréttaskýringarþátturinn Nightline fylgdist með æfingu flugbjörgunarsveitarinnar á Hellu á dögunum. Fréttamaður ABC brá sér í hlutverk slasaðs göngumanns.

„Einhver verður nú að gera þetta," sagði Kristinn Ingi Austmar í samtali við útsendara ABC-fréttastofunnar. „En tilfinningin þegar leit ber árangur er engri lík."

Starf sveitarinnar þykir augljóslega merkilegt á bandaríska mælikvarða enda eru meðlimir hennar langflestir sjálfboðaliðar.

Einnig var rætt við Svan Lárusson, trésmið í fullu starfi sem er engu að síður innan handar á öllum tímum sólarhrings þegar útkall berst. Svanur bendir á að Flugbjörgunarsveitin þurfi að standa í söfnunum til að fjármagna starfsemi sína.

Fréttamaður ABC lýsir sveitinni sem blöndu af björgunarstarfi bandarísku sérsveitarinnar, jákvæðni Skátanna og félagsanda lionsklúbbsins.

Hægt er að sjá brot úr umfjöllun Nightline hér fyrir neðan: