Stóra túnfiskbátamálið: Of seint að breyta

„Við skoðum þetta og tökum þetta sem gilda ábendingu - þetta verður að öllum líkindum tekið fyrir í stjórn félagsins á næstu dögum," segir Gunnar Skúli Guðjónsson, framkvæmdarstjóri Subway á Íslandi.

Í morgun sögðum við frá því að Samband íslenskra Subway snæðandi stúdenta (SÍSSS) harmi ákvörðun skyndibitastaðarins að gera túnfiskbátinn að báti mánaðarins í desember. Nú séu margir í prófum og báturinn sé óvinsæll meðal stúdenta. Bátur mánaðarins, er á betra verði en aðrir bátar á Subway.

Gunnar Skúli segir að ekki standi til að hætta við túnfiskbátinn í næsta mánuði, enda komi krafan frá SÍSSS heldur seint fram. „En við munum skoða þetta og ræða þetta hérna innanhús," segir hann.

„Ég skil reyndar ekki fordómana út í þennan bát, hann er mjög góður og afar vinsæll hjá okkur. En hann er eflaust ekki vinsæll í yngri hópnum, það er eflaust skýringin," segir Gunnar Skúli.

„Við skiptum greinilega máli, það er líka markmiðið hjá okkur - að selja góðar vörur á góðum verðum. Við höfum fengið frábærar viðtökur þegar við bjóðum upp á bát mánaðarins," segir hann að lokum.