Eldsneyti stolið af sjúkrabíl

Eldsneyti var stolið af sjúkrabíl í Reykjanesbæ í vikunni. Bifreiðin stóð á bílastæði við slökkvistöðina í Reykjanesbæ þegar óprúttnir aðilar í skjóli nætur tóku nær allt eldsneytið af bílnum.

Samkvæmt upplýsingum frá lögreglunni á Suðurnesjum getur slíkt athæfi haft afar alvarlegar afleiðingar þegar til neyðartilfella kemur og viðkomandi útkallstæki er nánast eldsneytislaust.

Umræddur sjúkrabíll er notaður sem varasjúkrabíll þegar aðrir bílar BS eru í útkalli. Það gerist reglulega að allir sjúkrabílar svæðisins eru uppteknir og þá þarf að grípa til varabílsins.

Á undanförnum vikum hefur borið á því að eldsneyti sé stolið af bílum og er skemmst að minnast eldsvoða við Iðavelli þegar verið var að dæla eldsneyti af bíl með þeim afleiðingum að eldur varð laus og mikið tjón hlaust af.

Jón Guðlaugsson, slökkviliðsstjóri Brunavarna Suðurnesja, segir slíka þjófnaði hafa verið að færast á annað stig undanfariðn. „ Ég veit ekki hvort að þeir sem leggjast svo lágt geri sér grein fyrir því að útkallið gæti eins verið til þeirra, eða þeirra ættingja sem og annara bæjarbúa," segir Jón.

Lögreglan biður þá sem eitthvað vita um málið að hafa samband í síma: 420-1800