Þórhallur til Saga Film - Þór Freysson til Stórveldisins

Þórhallur Gunnarsson, sem hefur starfað á Ríkissjónvarpinu síðustu ár, mun á næstu dögum taka við sem framleiðslustjóri hjá Saga Film. Hann verður yfirmaður allrar framleiðslu hjá fyrirtækinu og mun á sama tíma hætta á RÚV.

Það var fréttavefur DV sem greindi fyrst frá málinu í morgun en fréttastofa hefur einnig heimildir fyrir þessu. „Ég get ekkert tjáð mig um þetta," sagði Þórhallur þegar fréttastofa náði á hann í morgun.

Þá mun Þór Freysson, sem hefur starfað hjá Saga Film undanfarin sjö ár, fara yfir til framleiðslufyrirtækisins Stórveldisins. „Ég er bara mjög spenntur og glaður með þetta. Pælingin er að ég verði yfirframleiðandi þar - í svipuðu hlutverki og ég hef verið í hjá Saga Film," segir Þór í samtali við fréttastofu.

Stórveldið hefur framleitt meðal annars Ameríska Drauminn, Mannasiði Gillz, Heimsrétti Rikku, Týndu Kynslóðina, Andri á Flandri og fleiri þætti.

Þórhallur var ritstjóri Kastljóss og dagskrárstjóri sjónvarps. Síðustu ár hefur hann starfað í sérverkefnum hjá RÚV, nú síðast með þættina Á tali við Hemma Gunn.