Butenko: Heiður fyrir mig að fá að keppa við Gunnar

Gunnar Nelson mætir Alexander Butenko í Cage Contender keppninni í Dublin í kvöld. Rússinn segir það mikinn heiður að fá að keppa við Gunnar.

„Ég hef séð myndbönd frá bardögum hans og veit að hann er góður íþróttamaður, fagmaður og það er heiður fyrir mig að fá að keppa við hann á svo stóru móti," sagði Butenko í viðtali við Pál Bergmann.

Þeir Gunnar og Butenko náðu báðir vigt í gær. Gunnar vó 76,2 kg en Butenko 76,8 kg. Þeir keppa baðir í -77 kg flokki.

John Ferguson, skipuleggjandi keppninnar, ber Gunnari vel söguna.

„Gunnar er einstakur. Hann verður heimsmeistari áður en langt um líður. Stundum eru bardagamenn aðeins bardagamenn. Gunnar er hins vegar fínasti piltur sem hjálpar mér í samskiptum við hann," segir Ferguson. Hann bætir við að það hafi mikla þýðingu fyrir keppnina að fá stórt nafn á borð við Gunnar.

Bardagi Gunnars við Butenko verður í beinni útsendingu á Stöð 2 Sport í kvöld klukkan 21:30.



Hér má sjá viðtöl Páls Bergmann við þá Butenko og Ferguson.