Ekkert úrræði fyrir heimilislausar konur

Ekkert sérstakt úrræði er til í borginni fyrir heimilislausar konur sem glíma við bæði vímuefnafíkn og geðrænan vanda. Varaborgarfulltrúi segir að rekja megi dauðsföll til úrræðaleysisins.

Hluti heimilislausra í Reykjavík er tvígreindur, það er glímir við bæði vímuefnafíkn og geðræna erfiðleika. Ekki er langt síðan borgin bauð tvígreindum karlmönnum upp á sérstakt búsetuúrræði en slíkt er ekki í boði fyrir tvígreindar konur og það þykir Þorleifi Gunnlaugssyni varaborgarfulltrúa slæmt.

„Því miður hefur það alltaf verið þannig að karlarnir eru fyrstir til að fá úrræði hvað þetta varðar og konurnar koma á eftir og oft löngu á eftir. Það hefur nú verið viðurkennt að þetta er heilbrigðisvandi sem þarf að taka á og það er að mínu mati óásættanlegt að bíða með að veita konum sem sannarlega eru úti á götum með fíknisjúkdóma og aðra geðræna sjúkdóma viðunandi úrræði," segir Þorleifur Gunnlaugsson, varaborgarfulltrúi VG.

Þorleifur segir erfitt að meta hversu margar tvígreindar konur eru á götunni en hann telur hópinn skipta tugum. „Ég bara þekki einstaklinga sem að eru í þessari stöðu úr röðum kvenna og karla og ég veit til einstaklinga sem hafa dáið að mínu mati vegna þess að þeir fengu ekki viðunandi úrræði," segir hann. Hann segir að ekki sé gert ráð fyrir sérstöku úrræði fyrir konurnar í fjárhagsáætlun borgarinnar.

„Það er nýbúið að stofna hóp til að marka stefnu fyrir utangarðsfólk fyrir næstu árin. Vonandi náum við að taka þetta þar inn og afgreiða tillögur frá honum. Eins og ég segi, ég tel að borgarstjórinn í Reykjavík hann vilji virkilega gera vel í þessum efnum og við skulum láta á það reyna," segir Þorleifur Gunnlaugsson varaborgarfulltrúi.