Erfitt að spyrja um gleraugun á nefinu

Sömu tollareglur gilda um vörur sem keyptar eru á brottfararsvæði Leifsstöðvar og um varning sem keyptur er erlendis eða í komuverslun.

Spurður hvort slíkt gildi einnig um vörur eins og gleraugu segir Kári Gunnlaugsson, yfirtollvörður á Keflavíkurflugvelli, að svo sé en líka um aðrar vörur sem kaupa má í Leifsstöð, til dæmis úr eða skartgripi. Oft sé þó erfitt fyrir tollverði að sjá til þess að greidd séu viðeigandi gjöld af slíkum vörum.

„Þetta er eitt af þeim málum sem erfitt er að eiga við. Eiga tollverðir að stöðva fólk og spyrja hvort gleraugu hafi verið keypt í ferðinni?“ Kári tekur þó skýrt fram að fólki beri alltaf að framvísa öllum vörum sem fara yfir gjaldfrelsismörk, sem eru 32.500 krónur fyrir einstaka hluti.

Kjartan Kristjánsson, eigandi Optical Studio, segir að honum finnist ekki rétt að taka gleraugu sérstaklega fyrir í þessu samhengi. Í verslun hans séu vörur á svipuðu verðbili og mörgum öðrum verslunum í flugstöðinni, sem selja meðal annars fatnað, úr og áfengi.

„Það er öllum frjálst að versla í flugstöðinni fyrir hvaða upphæð sem er. Viðkomandi á það svo við sjálfan sig, ef farið yfir mörkin [32.500 krónur], hvort hann tilkynnir vöruna eður ei. Ég bendi mínum viðskiptavinum á bæklinga frá tollinum þar sem allar upplýsingar koma fram.“

Kjartan segir að flest innkaup í hans verslun séu undir fyrrnefndum mörkum. Þá bendir hann á að þrátt fyrir að viðskiptavinir gefi fram viðkomandi vöru við komuna til landsins geti verið um nokkurn sparnað að ræða. - þj