Mjög erfiðar aðstæður þegar tveimur var bjargað af strandstað

Áhöfn þyrlu Landhelgisgæslunnar tókst við mjög erfiðar aðstæður að bjarga tveimur skipbrotsmönnum úr fjörunni í grennd við Straumnesvita á norðanverðum Vestfjörðum laust fyrir klukkan níu í gærkvöldi, og voru þeir báðir heilir á húfi.

Fjaran er aðeins tíu metra breið og tekur þá þverhnípt bjarg við. 25 til 30 hnúta vindhraði var á vettvangi og gekk á með éljum, auk þess sem myrkur var skollið á.

Sigmaður úr þyrlunnni sótti báða mennina og voru þeir fluttir til Ísafjarðar, þar sem þeir fengu aðhlynningu á sjúkrahúsinu.

Það var um klukkan sjö í gærkvöldi að skipverjarnir sendu út neyðarkall þar sem báturinn var strandaður og var að brotna í sundur í stórgrýttri fjörunni. Mennirnir, sem báðir voru í flotgöllum, komust upp í fjöruna og var skipum og bátum stefnt á staðinn til aðstoðar.

Báturinn, sem heitir Jónína Brynja, er glænýr og vart undir hundrað milljóna króna virði. Ekki liggur fyrir hvort reynt verður að bjarga einhverjum verðmætum úr honum.