Brutu eigin lög og réðu leikhússtjóra án auglýsingar

Leikfélag Akureyrar fór framhjá lögum félagins þegar nýr leikhússtjóri var ráðinn, það er Ragnheiður Skúladóttir, en í lögum félagins kemur skýrt fram að leikhússtjóri skuli ráðinn til þriggja ára að undangenginni auglýsingu. Í þessu tilfelli var starf leikhússtjórans ekki auglýst auk þess sem Ragnheiður var ráðin til tveggja ára, en ekki þriggja.

Í frétt Akureyri vikublaðs um málið í dag birtist yfirlýsing frá formanns stjórnar LA, Sigrúnu Björk Jakobsdóttur, sem segir að stjórn félagsins hafi staðið einhuga að ákvörðuninni, „þótt í lögum félagsins segi að leikhússtjóri skuli ráðinn að undangenginni auglýsingu til þriggja ára."

Við þetta bætir Sigrún: „Nú á sér stað umræða um hugsanlegt aukið samstarf menningarstofnana á Akureyri sem geta falið í sér breytingar á starfsemi LA og þar með á starfi leikhússtjóra. Því þótti stjórninni þetta frávik frá lögum félagsins réttlætanlegt og óráðlegt í ljósi aðstæðna að ráða leikhússtjóra til lengri tíma en tveggja ára."

Leikfélagið hefur átt í verulegum fjárhagserfiðleikum síðustu misseri. Tap á rekstri Leikfélags Akureyrar árið 2010 nam 67 milljónum króna. Tapið mátti rekja að stórum hluta til frestunar félagsins á sýningum á söngleiknum Rocky Horror og færslu á kostnaði hans á milli áranna 2009 og 2010. Upphaflega var áætlað að setja sýninguna upp haustið 2009, en því var frestað um ár.

Leikfélagið endaði svo á að því að leita á náðir bæjarfélagsins um fjárhagsaðstoð. Engin gagnrýni hefur komið fram á valið sem slíkt, þ.e. að Ragnheiður Skúladóttir hafi verið ráðin, enda er hún sögð hafa unnið þrekvirki á skömmum tíma í endurreisn félagsins, samkvæmt frétt Akureyrar vikudags.

Hægt er að lesa nánar um málið á vefsíðu Akureyrar vikudags.