Ætlaði að verða lögfræðingur og kántrísöngkona

Hver er konan? Selma Björns­dóttir hérna megin.

Starf? Leikstjóri í Þjóðleikhúsinu, leikstjóri talsetninga í Myndformi, söngkona og leikkona.

Bakgrunnur/menntun? Verslunar­skóli Íslands, Bristol Old Vic ­Theater School, Ferðamálaskóli Flugleiða, masterclass í Complete Vocal Technique.

Hvernig kom það til að þú tókst að þér að leikstýra Vesalingunum? Tinna Gunnlaugsdóttir þjóðleikhússtjóri boðaði mig á fund sinn fyrir tæpu ári síðan og bauð mér þetta glæsilega verkefni. Ég þurfti ekki að hugsa mig lengi um.

Ætlaðir þú alltaf að verða leikstjóri? Ó nei! Ég ætlaði að verða lögfræðingur og kántrísöngkona í Dallas. Er reyndar kántrísöngkona í frístundum en get ekki sagt að lögfræðin heilli mig lengur.

Megum við eiga von á að sjá þig aftur á sviði? Já já, er einmitt að fara að stökkva inn í tvær leik­sýningar núna í mars og apríl. Annars vegar Dubbeldusch með Vesturporti í Gamla bíói í lok mars og hins vegar Rómeó og Júlíu með Vesturporti í Borgarleik­húsinu í apríl.

Áttu þér draumaverkefni? Já en þau eru leyndó. Vil ekki að aðrir viti um þau fyrr en þau verða að veruleika.

Hvernig gengur að samtvinna ­ferilinn og móðurhlutverkið? Það gengur vel. Þegar ég tek stór verkefni að mér skipulegg ég mig vel og set líf mitt í mjög fastar skorður til að ná að klára dagsverkið. Svo á ég stórkostlega ­foreldra sem hjálpa mér mikið og systur og vini sem leggja mér lið.

Hvað gerirðu þegar þú ert ekki að vinna? Mér lætur illa að hafa lítið að gera því þá hellist yfir mig ­þvílík leti að ég geri ekki handtak! En þegar ég á lausa stund frá vinnu þá fer ég í ræktina til ­hennar Ásthildar Björns­dóttur í Laugum og hún pískar mér út, hitti vini mína, fer í sund, út að borða, í leikhús, í sveitina og margt fleira.

Hvert er þitt mottó í lífinu? Að gera betur í dag en í gær, njóta hverrar stundar, hlæja brjálæðis­lega, elska fólkið mitt og vini mína og lifa í núinu.