Tollasektir yfir 50.000 fara á sakaskrár ferðafólks í 10 ár

Ef ferðamaður sem kemur til landsins þarf að greiða sekt sem nemur 50 þúsund krónum eða meira fyrir að fara í gegnum græna hliðið með tollskyldan varning fer hann á sakaskrá.

Samkvæmt upplýsingum frá ríkissaksóknara fara tollalagasektir inn á sakaskrá viðkomandi einstaklings, en fylgja ekki einkasakavottorðum sem fólk getur þurft að óska eftir sökum vinnu eða annarra mála. Á slík vottorð fara einungis hegningarlagabrot og ávana- eða fíkniefnalagabrot.

Fréttablaðið greindi frá því í gær að leyfilegt hámarksverðmæti varnings sem má koma með inn í landið tollfrjálst hefur staðið í stað frá árinu 2008. Á sama tíma hefur krónan rýrnað um þriðjung með tilheyrandi skerðingu á leyfilegum kaupum erlendis án þess að gefa vörur upp í tolli.

Í reglugerð um sakaskrár kemur fram að þeir sem hafa aðgang að upplýsingum úr sakaskrám eru dómstólar, dómsmálaráðuneytið, umboðsmaður Alþingis, Fangelsismálastofnun og Útlendingaeftirlitið. Ríkissaksóknari gefur út sakavottorð til erlendra yfirvalda vegna rannsóknar og meðferðar opinbers máls eða vegna öflunar ríkisfangs eða ökuréttinda.

Tollalagasektir eru aðgengilegar á sakaskrám einstaklinga tíu árum eftir að brotið er framið.

Snorri Olsen tollstjóri segir það koma reglulega upp að fólk þurfi að greiða meira en 50 þúsund krónur í sekt fyrir að fara með of dýran varning í gegnum græna hliðið. Hann hefur þó enga skoðun á því hvort viðmiðunarmörkin séu of lág og segir þær ákvarðanir alfarið liggja hjá stjórnvöldum.

Engu breytir hvort ferðamaður komi í gegn um hliðið með einn dýran hlut eða marga ódýrari, útskýrir Snorri. "Hvort sem þú ert að koma í gegn með fimm Iphone-síma eða einn 500 þúsund króna pels, er það alltaf heildarupphæðin sem skiptir máli," segir hann.