Íslenskum stjórnvöldum stefnt fyrir EFTA dómstólinn

Eftirlitsstofnun EFTA, ESA, ákvað í dag að stefna Íslandi fyrir EFTA dómstól í tveimur málum. Málin varða tvær tilskipanir sem ekki hafa verið innleiddar af Íslandi. Íslandi bar að innleiða báðar tilskipanirnar fyrir 1. nóvember í fyrra.

Annars vegar er um að ræða tilskipun sem varðar lánasamninga fyrir neytendur. Tilskipunin tekur t.d. til auglýsinga og staðlaðra upplýsinga sem veita þarf neytendum og er þar af leiðandi mikilvæg fyrir neytendavernd. Í tilkynningu ESA segir að tilskipunin gegni einnig mikilvægu hlutverki í samræmingu rammalöggjafar EES réttar og styrkingu innri markaðarins varðandi neytendalán. Tilskipunin gildi um neytendalán að upphæð milli 200 evra og 75 000 evra. Húsnæðislán og lán tengd kaup á landi eða fasteign séu undanskilin gildissviði tilskipunarinnar.

Hin tilskipunin varðar undirbúning, markaðssetningu og notkun á lyfjablönduðu fóðri. Lyfjablandað fóður er dýrafóður sem hefur verið bætt með lyfjum t.d. sýklalyfjum og mótefnum. ESA segir að sú aðferð að bæta lyfjum við dýrafóður geti verið hagnýt leið til að stjórna lyfjagjöf dýra. Slík lyfjagjöf þurfi, engu að síður, að vera í samræmi við reglur um dýralyf. Reglurnar séu mikilvægar til að tryggja að leifar lyfjanna sé ekki að finna í kjöti sem ætlað sé til manneldis.

Þar sem Ísland tók ekki til fullnægjandi aðgerða til að innleiða tilskipanirnar eftir að ESA gaf út ráðgefandi álit í júní og júlí 2012, mun málunum nú verða stefnt fyrir dómstólinn.