Ríkið tekur desemberuppbótina

Ríkið tekur til sín nærri fjörutíu prósent af desemberuppbót landsmanna í formi tekjuskatts. Af sextíu þúsund króna uppbót renna rúmlega tuttugu og þrjú þúsund krónur í ríkiskassann.

Launþegar fá greidda desemberuppbót um næstu mánaðamót í samræmi við kjarasamninga. Peningarnir koma sér eflaust vel fyrir marga enda kostar það sitt að halda gleðiileg jól. Þó upphæðirnar líti vel út á blaði er ekki allt sem sýnist enda vill ríkið fá sitt áður en peningarnir renna í vasa launþega.

Tökum nokkur dæmi en uppbótin er mismunandi eftir kjarasamningum og þá skipta heildarlaun einnig máli þegar kemur að skattlagningu.

Fyrst er það einstaklingur með 330 þúsund krónur í laun. Hann fær rúmar fimmtíu þúsund krónur í desemberuppbót. Af þeirri upphæð fara rúmar 19 þúsund krónur í ríkiskassann en tæpar 31 þúsund krónur í vasa launþegans.

Svo er það einstaklingur með 430 þúsund krónur sem fær sextíu þúsund í desemberuppbót. Rúmar 23 þúsund krónur fara í ríkiskassann en launþeginn fær tæpar 37 þúsund krónur.

Loks er það einstaklingur með 800 þúsund krónur í laun. Hann fær rúmar 57 þúsund krónur í desemberuppbót. Ríkið fær rúmar 25 þúsund krónu í sinn hlut en launþeginn um 32 þúsund krónur.

Miðað við þessi dæmi er ríkið að meðaltali að taka til sín 38 til 45 prósent af desemberuppbót landsmanna.