Sífellt fleiri karlar láta minnka brjóstin sín

Brjóstaaðgerðum karla þar sem menn láta minnka brjóstin hefur fjölgað að undanförnu, bæði erlendis og hér á landi. Lýtalæknir segir að helsta ástæðan sé aukin krafa um fallegt útlit.

„Já, ég held ég geti sagt það með fullri sannfæringu að svona aðgerðir hafa aukist," segir Guðmundur Már Stefánsson lýtalæknir í Domus Medica.

Það eru einkum tveir aldurshópar sem sækja í aðgerðir af þessum toga, annars vegar ungir karlmenn sem fá stundum ofvöxt í sjálfan brjóstkirtilinn og hins vegar eldri karlmenn sem fara að bæta á sig fitu þegar hægir á efnaskiptum líkamans.

Auk þess eru það karlmenn sem stríða við offitu sem sækja í brjóstaminnkunaraðgerðir.

„Það sem veldur því er almenn vitundarvakning um heilbrigði og eigið útlit. Krafan um að líta vel út hefur aukist verulega," segir Guðmundur.

Algengt form á of stóru karlmannsbrjósti er oddmjótt og tútnar út við geirvörtuna. „Ég hef haft hér karlmenn sem hafa nánast þurft að nota brjóstahaldara þó þeir séu grannvaxnir," segir hann. „Margir þeirra segja að þetta liggi í ættinni."

Guðmundur var gestur í útvarpsþættinum Reykjavík Síðdegis á Bylgjunni í dag þar sem hann ræddi málefni brjóststórra karlmanna.