Níddist á börnum og borgaði þeim fyrir

Héraðsdómur Reykjavíkur dæmdi í gær mann á fimmtugsaldri í sjö ára fangelsi fyrir að níðast kynferðislega á tveimur börnum, dreng og stúlku, um árabil.

Fram kemur í dómnum að eftir því sem á leið hafi maðurinn farið að borga báðum þolendum fyrir samræðið, um fimm til tíu þúsund krónur í hvert sinn.

Dómurinn er með þeim þyngstu sem fallið hefur á Íslandi fyrir kynferðisbrot. Aðeins þrír átta ára fangelsisdómar eru þyngri.

Stúlkan sem maðurinn braut gegn er í dag hálfþrítug og pilturinn um tvítugt. Brotin voru hins vegar framin frá því fyrir síðustu aldamót og gegn piltinum allt til ársins 2010, þegar hann var átján ára og sagði loks frá ofbeldinu.

Stúlkan er systurdóttir konu mannsins. Pilturinn og sonur mannsins voru vinir frá sex ára aldri.

Maðurinn var handtekinn í nóvember 2010 og sat í gæsluvarðhaldi í rúma viku. Framlengingu þess á grundvelli almannahagsmuna var hafnað.

Hann neitaði alla tíð sök og framburður hans var stöðugur. Hins vegar er byggt á jafnstöðugum framburði beggja brotaþolanna við sönnunarmatið, og eins mati sálfræðinga sem telja bæði piltinn og stúlkuna glíma við mikla erfiðleika sem rími við frásögn þeirra af langvinnri misnotkun.

Maðurinn er því fundinn sekur um að hafa misnotað drenginn frá sjö til tíu ára aldurs, og aftur frá fjórtán til átján ára aldurs og haft við hann munnmök og endaþarmsmök. Þá er hann sakfelldur fyrir að hafa haft munnmök og samræði við stúlkuna þegar hún var tólf til fimmtán ára.

Þolendurnir hafa báðir átt mjög erfitt vegna ofbeldisins. Stúlkan er óvinnufær vegna kvíðaröskunar sem sálfræðingur telur öruggt að sé afleiðing misnotkunarinnar. Pilturinn fór út af sporinu, ánetjaðist fíkniefnum og á erfitt með að skynja líkama sinn rétt.

Maðurinn er dæmdur til að greiða stúlkunni 1,6 milljónir í bætur og piltinum þrjár milljónir.