Ríkisstjórnin samþykkti að lengja fæðingarorlof

Ríkisstjórnin samþykkti á fundi sínum í morgun frumvarp velferðarráðherra um að greiðslur í fæðingarorlofi verði hækkaðar á ný og fæðingarorlofið lengt úr níu mánuðum í tólf í áföngum.

Frumvarpið er lagt fram til breytinga á lögum um fæðingar- og foreldraorlof í því skyni að hefja endurreisn fæðingarorlofskerfsins þannig að það verði í það minnsta jafnsett því kerfi sem var í gildi fyrir árið 2009. Þá voru greiðslur úr sjóðnum skertar, en það var liður í sparnaðaraðgerðum ríkisins eftir efnahagshrunið.

Í frumvarpi velferðarráðherra er gert ráð fyrir að hámarksgreiðsla verði hækkuð úr 300 þúsund krónum í 350 þúsund krónur strax 1. janúar 2013.

Þá er lagt er til að foreldrar í fæðingarorlofi fái að nýju 80% af meðtaltali heildarlauna á tilteknu viðmiðunartímabili í fæðingarorlofi.

Einnig er lagt til að fæðingarorlof foreldra verði lengt úr níu mánuðum í tólf mánuði í áföngum og að lengingin verði komin að fullu til framkvæmda á árinu 2016. Áhersla er lögð á að foreldrar eigi jafna möguleika á að taka fæðingarorlof og er lagt til að sama skipting og verið hefur verði áfram. Þannig bætist einn mánuður við sjálfstæðan rétt hvors foreldris og jafnframt einn mánuður við sameiginlegan rétt foreldra.

Þá er lögð til breyting á framlengingu fæðingarorlofs foreldra langveikra eða alvarlegra fatlaðra barna.