Trúir ekki að ríkisstjórnin ætli að svíkja loforðin

Skólameistari Fjölbrautaskóla Suðurnesja (FS) trúir ekki að ríkisstjórnin ætli að svíkja loforð sem gefin voru fyrir um tveimur árum um að tryggja rekstur menntastofnana á Suðurnesjum.

Í gær spurðist út að 70 milljóna króna fjárveiting væri nauðsynleg til að reka FS á næsta ári. Ef hún fæst ekki neyðist stjórn skólans til að fækka starfsfólki um 12-14 stöðugildi og fækka nemendum um 200.

„Þetta getur haft mjög slæmar afleiðingar fyrir menntun á Suðurnesjum," segir Kristján Ásmundsson, skólameistari FS, í viðtali við Víkurfréttir. Hann bendir á að fyrir tveimur árum hafi ríkisstjórnin fundað um rekstur menntastofnana í Reykjanesbæ og lofað að hann yrði tryggður og þróað yrði fjölbreyttara námsframboð á svæðinu.

„Ég trúi því hreinlega ekki að ríkisstjórnin ætli nú að svíkja loforðin sem þeir gáfu. Við höfum sýnt mikið aðhald í rekstri á síðustu árum og náð góðum árangri," segir Kristján.

Fyrrum fjármálaráðherra krefst lausnar

„Krefjast verður þess að menntamálaráðuneytið og stjórnendur Fjölbrautaskóla Suðurnesja finni lausn á álitamálunum," segir Oddný Harðardóttir, formaður þingflokks Samfylkingarinnar og annar þingmaður í Suðurkjördæmi, í samtali við Víkurfréttir.

Hún segir að ríkisstjórnin verði að gefa skýr skilaboð um að ungmennum á Suðurnesjum verði ekki frekar en öðrum ungmennum á landinu meinuð skólavist á næsta ári, en ef fram fer sem horfir verður nauðsynlegt að fækka nemendum í skólanum úr 1.100 niður í um 900. Þeir munu ekki hafa hægt um vik að leita sér menntunar annars staðar og munu að líkindum lenda utanveltu. „Ekki er mikla vinnu að fá fyrir þennan aldurshóp á svæðinu og ekki eiga þessir aðilar rétt á atvinnuleysisbótum," segir Ísak Ernir Kristinsson, formaður Nemendafélags Fjölbrautaskóla Suðurnesja, á vef Víkurfrétta.